Сусветны дзень пісьменніка

Штогод ва ўсім свеце 3 сакавіка адзначаецца дзень пісьменніка. У гэты дзень хочацца падзякаваць у думках ці асабіста тым людзям, якія ствараюць для нас літаратурныя цуды, тым людзям, якія здольныя рабіць са слоў і вобразаў унікальны свет. Свята было заснавана ў 1986 годзе ПЭН-клубам – міжнародным аб’яднаннем прафесійных літаратараў (назва ўтворана з першых літар англійскіх слоў "poet", "essayist" і "novelist"). Між іншым, у Беларусі таксама ёсць свой ПЭН-цэнтр, а вось прафесіі пісьменніка як такога не існуе. Але мы ўсё адно любім мастакоў слова – сваіх і чужых, жывых і мёртвых, прызнаных і малавядомых. Напэўна, у кожнага з нас ёсць тыя аўтары, якімі мы шчыра захапляемся, якія аднойчы апынуліся ў нашых сэрцах і ўжо нікуды ад нас не падзенуцца. Дзякуй ім!